: Traffic system ng MMDA computerized na

WALA nang lusot ang mga driver na bumabale-wala sa iniisyung ticket ng Metro Manila Development Authority (MMDA) sa oras na lumabag sila sa batas-trapiko.

Ito ang ibinigay na babala ni MMDA chairman Bayani Fernando sa mga pasaway na driver na patuloy na dinededma ang ipinatutupad ng Metro Traffic Ticketing (MIT) system.

Ayon kay Fernando, computerized na ang kanilang sistema at lahat ng kanilang record ay tugma at nakatala na rin sa Land Transportations Office (LTO) kaya't tiyak na mabibisto ang sinumang driver na hindi magbabayad sa nagawa nilang paglabag sa batas-trapiko.

Tiyak aniya na mabubuko ang mga balasubas na driver sa oras na mag-renew na sila ng kanilang lisensiya.

Ang masama nito, magpapatong-patong pa aniya ang interes na babayaran ng sinumang driver na hindi tatalima sa pagbabayad ng kanilng
MMDA chief Bayani Fernando

ticket sa itinakdang panahon mula nang sila'y maisyuhan ng MIT.

Ayon kay Fernando, namihasa ang mga driver na dedmahin ang pagtubos ng kanilang lisensiya noong iniisyuhan pa sila ng Traffic Violation Receipt (TVR) sa oras na mahuli sa paglabas sa batas-trapiko at sa halip ay naghahain na lamang ng kanilang affidavit of lost para muling makakuha ng bagong lisensiya.

Katuwiran umano ng mga driver noon na mas nakakatipid sila sa pagkuha ng bagong lisensiya sa halip na tubusin ang TVR na inisyu sa kanila dahil sa paglabag sa batas-trapiko.

Sa bagong patakaran, hindi na aniya magagawa ito ng mga driver dahil tiyak na mabubuko na sila bunga na rin ng makabagong sistema ng computerization.